На базе ДУА «Петрыкаўская дзіцячая школа мастацтваў» прайшла сустрэча дэпутата Палаты прадстаўнікоў нацыянальнага сходу Рэспублікі Беларусь Ірыны Кралевіч з работнікамі ўстаноў культуры Петрыкаўшчыны.
У час сустрэчы Ірына Мікалаеўна пазнаёміла прысутных з праектам новай Канстытуцыі, які, між іншым, сёння вынесены на абмеркаванне грамадскасці.
Як адзначыла Ірына Мікалаеўна, змены ў Асноўны закон краіны – з'ява заканамерная: свет не стаіць на месцы, новыя рэаліі патрабуюць адпаведнай заканадаўчай базы, у праціўным выпадку грамадства чакае глыбокі палітычны і грамадскі крызіс.
– Вялікая работа праведзена па аднаўленні Канстытуцыі. Кожны артыкул дэталёва прапрацаваны, бо мае немалаважнае значэнне – закон не церпіць двухсэнсоўнасці.
Прафесійны склад Канстытуцыйнай камісіі сваю справу зрабіў – праект Канстытуцыі падрыхтаваны і перададзены народу для вывучэння і абмеркавання.
Цяпер справа за вамі: знаёмцеся і дасылайце свае прапановы, калі такія будуць. Адваротная сувязь – немалаважны момант, які павінна прайсці беларускае грамадства, перш чым будзе прынята на рэферэндуме новая Канстытуцыя.