Беласнежныя цюкі, што раскінуліся на зялёных палях нашай радзімы, сёння мала каго здзіўляюць. Нягледзячы на вялікі кошт тэхналогіі, гаспадаркі краіны ўжо ва ўсю моц яе выкарыстоўваюць і нават эксперыментуюць з ёй. Трава, упакаваная ў стрэтч-плёнку, забяспечвае высокую якасць сенажу.
У час рэпартажу з палёў зарэчнай
зоны пра эфектыўнасць упакоўкі травяных кармоў у палімерныя матэрыялы нам
расказаў кіраўнік аддзялення ПУП “Вялаўск” Палессе-Аграінвест Васіль Казачэнка.
Васіль Уладзіміравіч доўгі час кіраваў Вялаўскай базавай школай, а калі
тэрыторыі адышлі Мазырскаму раёну, вырашыў перайсці працаваць у родную
гаспадарку. Мужчына адзначыў, што тут вялікую дапамогу аказваў чулы кіраўнік
Аляксандр Верамееў. Ён заўсёды прыслухоўваецца да сваіх падначаленых.
– Настаўнікі настолькі загартаваныя, што могуць асвоіць новую прафесію хутка! – жартуе мой суразмоўца і працягвае: – Вядома, тэхналогія нарыхтоўкі кармоў з правяленай травы з пакаваннем у палімерныя матэрыялы дазваляе атрымліваць больш якасны травяны корм. Менавіта пры скормліванні каровам сенажу, яны даюць малако класа “Экстра”. Варта адзначыць, што тэхналогія патрабуе дакладнага выканання.
На пытанне, у які момант
могуць узнікнуць цяжкасці, кіраўнік адказаў, што бываюць форс-мажоры, не без
гэтага. Умовы надвор’я таксама могуць паўплываць на якасць сенажу.
Асаблівы гонар для Васіля Уладзіміравіча –
тэхніка. Тут яна, падбіраючы скошаную і падвяленую траву, адначасова абкручвае
яе сеткай і плёнкай. Прэс-падборшчыкі і пакавальнікі працуюць практычна
адначасова, гэта станоўча адбіваецца на захаванасці корму.
– Першы ўкос шматгадовай травы асабліва важны –
у гэты перыяд будучы сянаж найбольш пажыўны і сакавіты, – працягвае наш герой.
– Цімафееўка, без сумнення, самая папулярная зёлка не толькі ў нашай
мясцовасці, але і па ўсёй Гомельскай вобласці.
У гаспадарцы першы ўкос набліжаецца да
завяршэння, засталося каля 10 працэнтаў плошчаў, хутка пачнуць другі.
– Тры работнікі ў нас
прасуюць, 1 косіць і 3 – на адвозцы. Працуем у дзве змены. У сярэднім
скошваецца 75 гектараў за дзень. Саміх цюкоў за сезон мы нарыхтоўваем каля 5
тысяч. Так, лічба не маленькая, як і праца. Адзін цюк важыць ад 800 кілаграмаў
да 1 тоны. У дзень мае работнікі “афармляюць” у сярэднім 300-400 цюкоў, у
рэкордныя дні – усе 500. Дзякуючы зладжанай працы днямі здалі 8 тон малака
высокай якасці.
Распавёў нам кіраўнік і пра сістэму харчавання
працаўнікоў прадпрыемства.
– Абеды работнікам кампенсуюць у грашовым эквіваленце. Таксама мы выкарыстоўваем сістэму заахвочвання: работнікам раз на месяц выдаем прэмію ў натуральнай форме – ад 14 кілаграмаў мяса, але тут важна выканаць сваю працу добрасумленна і не нарабіць памылак. У якасці падарунка да свята Святой Тройцы наш кіраўнік Аляксандр Верамееў не шкадуе 5 кілаграмаў свежага мяса і сала на кожнага работніка. Так што ёсць да чаго імкнуцца. Асобная падзяка намеснікам Івану Фешчанку і Кацярыне Махнаткінай за згуртаваную працу. Задача ў нашага прадпрыемства – павялічыць валавы надой малака і вывесці яго на 100% класа “Экстра”.
Наталля
ПЕТРУШЭНКА.
Фота аўтара.